السلام عليكم 🤝🏻
آش كيوقع نهار 2 شتنبر؟ نهار توقيع محضر الدخول، كيفاش كيتوزعو الوحدات المدرسية؟ والمستويات الدراسية على الأساتذة؟ 🤔
وهذا ما يسمى التنظيم التربوي.📑
هاد السؤال توصلنا به بزاف خلال العطلة وارتأينا أننا نجاوبو عليه مع الدخول المدرسي. ما علينا، نشوفو بعدا علاش كتوقع إعادة هاد التنظيم التربوي، بمعنى ما الدواعي إليه ؟🤔
** دواعي إعادة التنظيم التربوي:📋🗃
1- حدوث تقليص في البنية التربوية أو توسعها: يعني يقدر يتزاد عدد المستويات ف المدرسة أو ينقصو (مثلا شي موسم دراسي يقدرو يكونو 2 أقسام ديالا تحضيري و 3 أقسام ديال الثاني لكن الموسم الآخر يقدر يولي غير قسم ديال التحضيري و 2 ديال الثاني وهكذا ..)🏠
2- وجود فائض أو خصاص في المدرسين العاملين بالمؤسسة: هاد القضية ديال الخصاص هي للي كتسبب لينا ف الأقسام المشتركة.🤦🏻♂
3- تقسيم مدرسة مستقلة أو إدماج مدرستين مستقلتين: ملي كتكون عندنا شي مدرسة مستقلة وكتقسم لفرعيات مثلا خاص يوقع إعادة التنظيم باش نعرفو شكون يمشي لهاد الفرعية ولا لهادي، وفي حالة كانو شي 2 مدارس مستقلة وتجمعو بحكم مبقاش فيهم التلاميذ بزاف مثلا فهاد الحالة كذلك كيوقع إعادة التظيم باش نعرفو شكون يشد كل مستوى.🏠
4- تقسيم مجموعة مدرسية أو تحويلها إلى مدرسة مستقلة / مدرسة جماعتية أو إدماج مجموعتين مدرسيتين : وهادي بحال الحالة رقم3.👆🏻
مزيان، ولكن ما هي معايير توزيع الأستاذات والأساتذة بالوحدات المدرسية؟🤔
في العالم القروي للي عندنا فيه الوحدات المدرسية (الفرعيات) يتم توزيع الأستاذات والأساتذة في إطار تشاوري داخل المجالس التربوية (تعقد في آخر الموسم الدراسي السابق) 🤝🏻ولا في الاجتماعات الخاصة بالتحضير للموسم الدراسي (يعني هادشي ديال التوزيع كيجرى في آخر السنة بالنسبة للناس للي ما نتاقلوش حيت هما للي عندهم الأقدمية وغادي نشرحو كيفاش هاد لعيبة) ونهار توقيع محضر الدخول كيلقاو الناس جداد مول لمليح باع وراح وكتبقى المنافسة على المراكز المؤدية لليوروبا ليغ.😏 وكاين للي مكيناقشوش هادشي حتى لنهار توقيع محضر الدخول.
وفي حالة ماكانش اتفاق وتراضي💣⚔ وهادشي للي كيوقع غالبا، كيفاش غادي يتم التوزيع ؟ 🤔
هنا كندوزو للمعايير وهي:
1- الأقدمية بالمجموعة المدرسية (حسب قرار التعيين)، يعني شكون سابق ف المجموعة وهادي فيها روينة غير بوحدها، علاش؟ نفتارضو الأستاذ زيد والأستاذ عزيز كيشتغلو بنفس المجموعة المدرسية لكن زيد سابق عزيز بعام دراسي، ونفترض زيد مبقاتش عاجباه الفرعية للي فيها وبغى ينتقل للفرعية للي فيها عزيز، هنا كيولي هو سابق عزيز ف الاختيار وحتى ف اختيار المستويات ويقدر ياخد المستوى للي كان شادو عزيز (وهادشي مغاديش يبغيه عزيز، وهاااا علاش كلنا روينة).😭😤
2- الأقدمية بالمديرية الإقليمية (شحال ونت خدام ف المديرية).
3- الأقدمية العامة (تاريخ التوظيف بقطاع التربية الوطنية).
4- السن. 👱🏻👨🏻🦳
📌لا يتم اللجوء إلى المعيار الموالي إلا في حالة التساوي في المعيار الذي قبله.
📌وفي حالة كان التساوي ف كلشي يتم اللجوء إلى القرعة ويتم ذلك بتحرير محضر يوقع من طرف كل الأستاذات والأساتذة العاملين بالمؤسسة.📝
مزيان آسي، دابا وزعنا الوحدات المدرسية، كيفاش غادي نوزعو المستويات والأقسام ؟🤔
نفس الأمر عاود ثاني يكون التوزيع بالتراضي على ألا يكون ذلك على حساب مصلحة المتعلمات والمتعلمين وفي حالة مكانش تراضي عاود ثاني💣⚔ يتم اللجوء إلى نفس المعايير للي اعتمدنا ف توزيع الوحدات المدرسية.👆🏻
📌وقضية أخرى خاص نعرفوها وهي أن التنظيم التربوي المعد في آخر السنة لا يعتبر نهائيا إلا بعد 31 أكتوبر من نفس السنة 📆ولا يقبل حينها أي طعن من قبل الأستاذات والأساتذة العاملين بالمؤسسة كما لا يعتبر التنظيم التربوي للمؤسسة ساري المفعول إلا بعد مصادقة كل من المدير ومفتش المنطقة عليه.🕵🏻
كاينة شي مقتضيات غادي تلقاوها ف المذكرة الخاصة بالتنظيم التربوي دابا نحطها حتى هي باش تطلعو عليها.📜
التعليقات